Isagoo u waramayay Wakaaladda Wararka ee AFP Audace Nduwumunsi oo ah Taliye ku xigeenka Ciidamada AMISOM ayaa waxa uu sheegay in Ciidamada AMISOM ay duulaan ku yihiin degmada Afgooye ee gobolka Sh.hoose halkaasi oo ay gacanta ku hayaan Kooxda Al Shabaab oo cadeysatay inay xiriir la leedahay Urur weynaha Al-qaacidda.

Taliye ku xigeenka Ciidamada AMISOM ayaa shegay in Ciidamadoodu ay diyaar u yihiin la dagaalanka Kooxda Al Shabaab, isagoo xusay in lagama maarmaan ay tahay in hal meel looga soo wada jeesto kooxdaasi oo uu carabaabay inay dhibaato ku hayaan shacabka Soomaaliyeed.

Sarkaalkaani ka tirsan Ciidamda Amidowga Afrika AMSIOM ee jooga Soomaaliya ayaa sheegay inay diyaariyeen qorshihiii ay Ciidamadoodu ugu duuli lahaayeen gobolkaasi, isagoo carabka ku dhuftay in sidoo kale ay duulaan ku yihiin Magaalada Xeebeedka Kismaayo oo ay dhaqaalo badan ka helaan Kooxda Al Shabab.

Audace Nduwumunsi ayaa shegay in Ciidamada AMISOM ay ka go’antahay la dagaalanka Kooxdaasi, isagoo carabka ku dhuftay inay wiiqantay awooddii Al Shabab ay ku lahaayeen Magaalada Muqdisho iyo gobolada dalka oo uu sheegay inay kala kulmeen cadaadis xooggan.

Hadalkaani ayaa kusoo adaya xilli Ciidamada AMISOM ay wali Magaalada Muqdisho ka wadaan howlgallo ka dhan ah Al Shabaab, iyadoo sidoo kale ay xusid mudantahay in howlgallo kuwaasi la mid ah ay ka socdaan gobolada dalka taasi oo ay Saraakiisha Ciidamada Kenya sheegeen inay Shabaabku ay ku qasabtay inay ku biiraan Ururka Al-qaacidda.